Mubong Sugilanon – Textmate

Ni Radyoman Buen Algono

“Kumbate gyod ni ron!” sa huna-huna ni Matoy nga naghinam-hinam na nga iyang magakos ang iyang textmate.

Daghan ug textmate si Matoy apan sa usa lang niya nga textmate siya na-inlove ug mayo.

Usa ka bowan na niya nga textmate ang babaye nga nagpailang Angel. Bisan ug wala pa sila nagkita apan mibati na siya ug pagmahal niini gumikan sa mga pakilig nga mga text messages.

Mibagting ang iyang cellphone. Mi-text si Angel.

“Hi Matt, how are yu na?” ang text ni Angel.

Naglumpayat ang dughan ni Matoy nga nagbasa sa mga text messages ni Angel. Wala siya kaagwanta, iya kining gitawagan apan wala tubaga.

“Sorry Matt ha, pede text lng?” text ni Angel.

“Ngano man Gel?” bawos nga text ni Matoy.

“Basta, shy man gudko nga makig-talk ug guy”.

“Ok, no probs Gel, but ang atong sabot nga i-bol ha? Syur na to ha?”

“Yup”.

Nagsabot sila si Matoy ug Angel nga magkita. Dali ra niyang nakombinsir si Angel nga magkita sa usa ka motel atol sa Valentine’s Day.

Miabot ang Pebrero 14, nangandam na si Matoy. Gikurtihan niya ang iyang bigote. Nagpahumot siyag mayo.

Mga alas 5:00 pa gani sa hapon, mi-check-in na daan si Matoy sa usa ka motel.

“Twelve hours lang ang ako Miss. Bali duha mi kabuok”, ni Matoy ngadto sa attendant sa usa ka motel.

Sa sulod sa motel, nangandam daan si Matoy sa dakong kumbate.

Nag-inom siya daan ug makapakusgan sa iyang tuhod.

Mibagting ang iyang cellphone.

“Hi Matt, here na ko”, text ni Angel.

“Nia ko sa Room 103”, text ni Matoy.

Sa imahinasyon ni Matoy, ang iyang textmate sama ka-seksi ug kaguwapa ni Katrina Halili.

“Swak gyod ni ron!” ang naghinam-hinam nga huna-huna ni Matoy.

“Matt, mao na to ha. I-dark lang ha?” text ni Angel.

“Ok Gel”, text ni Matoy.

“Gusto nig thrilling babayhana da kay gusto man ug ngitngit”, huna-huna ni Matoy.

“Matt, love me without sayin a word ha?” laing text ni Angel.

“Adventurous siguro ni siya da kay dili man gusto ug istorya”, huna-huna ni Matoy.

“K”, text ni Matoy.

Gipawong ni Matoy ang suga sa kuwarto sa motel.

“Matt, I’m here na”, text ni Angel.

“Ok, iopen lang ang door kay wala nako gi-lock”, text ni Matoy.

Hinay-hinay nga naabli ang pultahan sa kuwarto. Hinay-hinay usab kining gisirad-an pag-usab.

Bisan ug ngitngit, apan maklaro ug dyutay ni Matoy ang bayhon sa usa ka babaye nga nagkiay-kiay ug paingon sa iyang nahimutangan.

Misamot ang kahinam ni Matoy. Hinay-hinay nga milihok si Matoy ug gisabak ang iyang textmate. Lihokan sama sa kasag ang iyang mga kamot.

Human sa kagilok sa himaya, si Matoy nahisama sa kabayo sa Duljo nga miayagak sa pagsikad hangtod nga silang duha mihingal sa kakutas.

Human natagbaw ang duha sa dugos sa kalipay, ang naa sa huna-huna ni Matoy mao nga makita sa kinatibuk-an ang panagway ug tibuok lawas sa iyang textmate.

Gipasiga ni Matoy ang suga sa ilang lawak. Silang duha pulos nahingangha.

“Huh? Ikaw?” ni Matoy.

“Ikaw sab?”

“Maluibonnhhh!” ni Matoy nga labihan ang kasuko.

“Utro ka sab nga maluibonnhh!”

“Helia, ikaw ni?”

“Oo, ako tawon ni Matoy!”

“D-day”, ngano god ni?

“Mangutana kag ngano animala ka? Dali, manguli tas ato kay dunay daghang labhanan ang nagpaabot nimo amawa ka!”

Pangutana: Tag-ana kinsa ang babaye nga textmate ni Matoy ug iyang
gikauban sa motel atol sa Valentine’s Day?